胡鴻鈞投資6位數上海開銀飾店

【本報訊】胡楓、胡鴻鈞、蔚雨芯、施匡翹及楊潮凱等前晚到柴灣出席中秋慈善匯演。胡鴻鈞表示今個中秋還未知是否在港，因他稍後要到北京和上海工作，他自己都想陪伴家人一起過中秋。他表示上月底推出了國語歌，最近就忙於籌備第二次內地的巡演，今次計劃去廣東省及嘗試去省外的地方。

近年內地與香港兩邊走的他，透露最近在上海跟2位朋友合作開設銀飾店，主要代理國外品牌，他說：「因自己都鍾意佩戴銀飾，本身係顧客，而今次投資咗6位數，（可想在香港開分店？）呢間其實是那兩個朋友的分店，希望先做好上海店，再想香港開分店，唔好咁貪心先，當然希望可以在唔同城市推廣呢個文化。」問他可有送銀飾給緋聞女友蔡思貝？他笑說：「冇冇冇，冇送過畀任何人，生意艱難，如果真係朋友就支持下，我會畀折扣！」

蔚雨芯當晚以音樂大使現身， 歌手出道的她笑言一直未有放棄歌手夢，現時正籌備新歌，同時又在內地搞旅遊生意，以及在港的美容生意。